Termos de uso

1 · Que é isto

Reditu é unha app para que un grupo de motos vexa onde está cada un durante unha saída e poida pedir axuda aos demais. Usala implica aceptar estes termos. É para maiores de 16 anos.

2 · Estás a usar unha beta

A app está en probas. Pode fallar, perder cobertura, deixar de emitir a túa posición ou pecharse por decisión de Android ou do fabricante do teu móbil. Non garantimos dispoñibilidade nin exactitude. Durante a beta o servizo é gratuíto e podemos cambialo ou interrompelo sen avisar.

3 · Conducir é cousa túa

Non manipules o móbil en marcha. A tira está pensada para mirarse dunha ollada e os avisos para oírse polo intercomunicador, precisamente para non tocar a pantalla. Cumprir as normas de circulación e conducir con seguridade é responsabilidade túa, e a app non a substitúe nin a reduce.

4 · A túa conta e o teu grupo

• Es responsable do que se faga desde a túa conta e do código de invitación que repartes.
• Comparte o código só con xente coa que saes a rodar: quen o teña pode entrar no grupo e ver posicións.
• Non uses Reditu para seguir a alguén sen que o saiba. Calquera pode saír da excursión, saír do grupo ou borrar a súa conta cando queira.
• Podemos pechar contas que usen a app para acosar, suplantar outra persoa ou saltarse estes termos.

5 · O que non prometemos

Reditu non detecta caídas: o aviso de auxilio só sae se alguén o preme. Tampouco respondemos por danos derivados dun aviso que non chegou, chegou tarde ou chegou cando non tocaba, ata onde permite a lei. Nada disto limita os dereitos que che recoñece a normativa de consumo. Se algo non che encaixa, non uses a app.

6 · Prezo máis adiante

As funcións de seguridade seguirán sendo gratuítas. Se algún día hai funcións de pagamento, avisarase antes e nunca se cobrará polo que xa usas gratis durante a beta.

7 · Os teus datos

O que se trata, para que e quen o ve está na política de privacidade. Podes borrar a túa conta cando queiras: como facelo.

8 · Lei e xulgados

Estes termos réxense pola lexislación española. Como usuario consumidor, podes acudir aos xulgados do teu domicilio.